Nadau

Û die négre de bén-plouy y d'aygue-nèu, rét. En se-n tournan de-s ha couya, Jusèp que coussirè, tougnut, cap y coth enas espalles. Qu'abè tabé croumpat ûe fougasse.

- « Qué hès ? Si hès coùrre lou machan téms, qu'as escadut, ci-m sémble.

- « O, que-m abi tirat plans ta ha drin de légne… En se desarrigan, û castagnè dou plèch que-m a hèyt càde dus poumès. Que y a de qué ha. Que créy que-m caleré telefouna ou escrìbe à la meteo enta que hè ha bèt. Sinoûs que bau aténde la lûe de Nadau. Qu'éy ta de oéy en oéyt. Lou téms que-s deberé arrebira. Ou lhèu tau Pay de Nadau ? E-m aberé entenut y escoutat ? »

- « Hû !... Menchide-t d'aquét, sustout au noùste àdye. En badén biélh, qu'éy badut abìlle. N'engaline méy que lous maynats, ou lous qui bòlen decha-s engalina. Que-s counténte de da au méy aysit y au méy pressat. Tè, que boulèm demanda-u, l'an passat, la mama y you, séngles youlhs de recàmbi, y, e sàbes ço qui-ns a dit ? Que nou hasè méy aquét artìcle. Lou moùnde que bàden toustém méy biélhs. Biélhs que-n y a de méy ana méy, que soun hère trops à l'at demanda, y nou-s y pot tapoc hourni-u ne prou, ci dits. You que créy, ta dìse la bertat, que n'éy pas tan rìche coum dìsen. Y ét tabé, enta-s acama, ne bat pas hère lèste : que-s hè carreya sus ûe trasse. Alabéts, ta nou pas ha yelous…

- « Que-ns goàrde au ménch boû estoumac, ci digou la mama en pausan la toupîe de la soupe sus la taule. Tè, serbéch-te, Jusèp. »

Garbure hèyte de frésc, dus hourrups de goudale – qu'éy passat lou téms de la goudale de doùdze hourrups, y que cau counta dap lous esbagats de las casquétes - chingarre nabe y oéus dap fougasse… y batalère en boune coumpanie. Que cau entertiéne lou cos enta que l'amne nou-s y abéye y que-s y demoùre. Au diàble lou machan téms, la légne à ha, y lous youlhs qui arrougagnen !


À miéy matî de Nadau que-m tumèy dap Jusèp ena pourtalade de la glèyse. Autalèu, y dap quin plasé, qu'ou héy ma noubèle : ûe arrehilhe, atendude ta cap d'an, qu'éy badude à miéye-noéyt ! Quin Nadau ! B'éy toustém Nadau tau qui n'éy ni trop biciat, ni trop tentat !

Jan de Sègues

Lou toupî de garbure

Digues dounc, Dauninẹ, si créy, que-t prepares encoère aquéstẹ an ta prénẹ las ayguẹs de Cauterés. Tout aco qu’éy beroy, més you, û cop de méy, que boy demoura tout soul pendén très semmanes. Be sàbẹs que cau û baylet ta ha bìbẹ las garies e ha minya lous câs. Aquét tribalh que sera lou mé. Més ét-soubienès que nou sèy pas ha la cousine e que la toue soupe que-m ba ha rèyte tout aquét téms ? Escoute, abans de parti, digue-m quin hès enta escàdẹ aquét toupî de soupe qui m’agrade tan. Que bouleri saya.

« Cèrque-t û tros de papè e que-t boy dìsẹ quin as à ha. Que la te hès enta quàuquẹs dies.

Que prénẹs û toupî dous grans, e que coumences per hica û pè de betèt déns l’aygue réde. Si n’as pas û pè de betèt, que pòdẹs ha dab û yarrét, e sinoû û taloû de yamboû, û camayou. Que-y pòdẹs hourni alirots e pates de guits, si t’en demoure de la darrère prebisioû. Puch que hès bouri au ménch ûe orẹ, que-y hiques très cébes talhucades e, au cap de miéye orẹ, las arrabes, puch û quart d’ore après, las poumes de tèrre. En seguin, lou caulet – e sàbẹs, aquét frisat de Milan coum dìsẹn – dab quoàtẹ habes si-n as, e lous pourréts, e las carrotes.

Que sales e que hiques drin de yèrbe prime, quàuquẹs hoélhes de laurè, très clabets de canèle. Puch que demoures û téms, que goustes s’éy prou salat e que hès bouri tout dous. Atau qu’aberas la soupe e drin de car ta minya. Enta la counserba dinque que sie acabade e ta nou pas la lecha pica, que la hès bouri tout die cinc minutes. Atau qu’aberas de qué t’aucupa e d’aci enla que pensaras drin à you. Nou t’en hasques, que tournarèy, e que la te tournarèy ha ».

Denis GARUET

La marmite de soupe

Dis donc, Daunine, si je crois, tu te prépares encore cette année à aller en cure à Cauterets. Tout cela est bien, mais moi, une fois de plus, je vais rester tout seul pendant trois semaines. Je sais bien qu’il faut un domestique pour s’occuper des poules et faire manger les chiens. Ce travail sera le mien. Mais tu te souviens que je ne sais pas faire la cuisine et que ta soupe va me manquer tout ce temps. Ecoute, avant de partir, dis-moi comment tu fais pour réussir cette marmite de soupe que j’aime tant. Je vais essayer

« Cherche-toi un morceau de papier et je vais te dire comment tu dois faire. Tu dois te la faire pour quelques jours.

Tu prends une marmite, parmi les grandes, et tu commences par mettre un pied de veau dans l’eau froide. Si tu n’as pas un pied de veau, tu peux faire avec un jarret, et sinon un talon de jambon, ou l’os de jambon. Tu peux y ajouter des bouts d’ailes et des pates de canards, s’il t’en reste de la dernière provision. Puis tu fais bouillir au moins une heure, tu y mets trois oignons émincés et, après une demi-heure, les navets, puis un quart d’heure après, les pommes de terre. En suivant, le chou – tu sais ce frisé de Milan comme on l’appelle – avec quatre haricots si tu as, et les poireaux et les carottes.

Tu sales e tu mets un peu de thym, quelques feuilles de laurier, trois clous de girofles. Puis tu attends un moment, tu goûtes si cela est assez salé et tu fais bouillir tout doucement. Ainsi tu auras la soupe et un peu de viande pour manger. Pour la conserver jusqu’à ce qu’elle soit terminée et pour ne pas la laisser piqué, tu la fais bouillir tous les jours cinq minutes. Ainsi tu auras de quoi t’occuper et d’ici là tu penseras un peu à moi. Ne t’en fais pas, je reviendrai, et je t’en referai ».

Edité par l’Institut Béarnais et Gascon
Reproduction interdite sans autorisation

Pierre de Sabres

De las tarrìblẹs campagnes d’Afrique, lou Pierre que-s en abè pourtat û brassat de sàbrẹs e tabé, permou de la gran calou, si-m pénsi, û tarrìblẹ sequè de ganurre, de manière qu’abè toustém sét. En aqueth téms lou bî n’ère pas qu’a dus sos lou pintou, més, dap la soûe pensioû de brigadiè, que-n abè tout yùstẹ. Tabé, quoan estén usats touts lous bielhs unifòrmẹs qui-s en abè miat, que-n ana coum û bagamoun, més nou-n abè nade bergougne. Que disè qu’en Afrique lous arabes rìchẹs que-n anaben encoère méy espelhandrats que nou-n ère. La soue so, ûe bielhote pròpi coum û so nau, que-n ère escandalisade, més per tan qui-u ne digoùssẹ, lou fray nou-s en dabe pas. « Que-n èy tout yùstẹ ta bìbẹ ! Si-u hasè. D’oun bos que tìri lous dinès ta la pelhe, au prèts qui éy ? »

Bèt cop, nou sèy quin, qu’ous arriba û « retour ». Lou noutàri que hé sabé à la so, qui ère l’aynade, qu’ous s’escadè û milè de liures sus l’aretance d’û cousî. Que las s’anè coèlhẹ.
- Escoute, si digou en balha la soûe part au fray, que-m bas ha lou plasé de-t ana croumpa quoàtẹ camises, û costume, e caussa-t ! Que-m hès hàsti coum aco !
- Que tio, maynade, qu’at harèy puch que-t hè plasé.

Be pensat ço qui arriba ? Quoàtẹ dies après, la so qu’ou rencountrè méy pipaut que yaméy.

- B’ès lou trìstẹ animau ! Si-u hé. Be-m abès toutu proumetut…
- Escoute, nou-t fàchẹs pas, qu’èy hèyt ûe counsulte.
- Quin, ûe counsulte ? Que cantes, aquiu ?
- Quio, ûe counsulte. Qu’èy demandat au mé cap : as besougn d’û berrét nau ? Nou-m a pas respounut. Aus més pès : e boulet esclops ? N’an pas tournat arré. E lous bras, las cames e lou cos, qu’éy estat pariè. Ta que boulès qu’ous fourcèssi ? Més quoan èy demandat à la bouque si abè sét… Ah ! labets, moun amic !

Poupebinat

ESPLICS :


Û brassat de sàbrẹs : une brassée, ici il faut lire une collection de sabres
De manière qu’abè toustém sét : à tel point qu’il avait toujours soif
Que-n ana coum û bagamoun : il alla comme un vagabond
Nou-n abè nade bergougne : il n’en avait aucune honte
Que-n anaben encoère méy espelhandrats que nou-n ère : ils allaient encore plus dépenaillés
qu’il ne l’était.
Que-n ère escandalisade : en était offusquée
Més per tan qui-u ne digoùssẹ : elle avait beau lui dire
Lou fray nou-s en dabe pas : le frère n’en tenait pas compte
Si-u hasè : disait-il
Bèt cop, nou sèy quin, qu’ous arriba û retour : un beau jour, je ne sais quand, leur arriva un héritage
Qu’ous s’escadè û milè de liures : leur revenait 1000 francs
Aretance : héritage
Que las s’anè coèlhẹ : elle alla les chercher
Que-m hès hasti : tu me dégoûtes
Que tio = que qui o : que oui
Be pensat ço qui arriba : vous pensez bien ce qui arriva
Méy pipaut que yaméy : plus sale que jamais
Qu’éy hèyt ûe counsulte : j’ai fait une consultation
Quio : et oui
Ta que boulès qu’ous fourcèssi ? : pourquoi voulais-tu que je les forces ?

Desaguis de câs

« Les excréments solides et liquides des chiens et autres animaux » atau qu’apèren lous preséns qui dèchen lous câs au moùndẹ de la bile e de las campagnes. Qu’éy defendut aus câs de decha mustres dou lou passàdyẹ, ce dìsin soubén lous màyrẹs, e l’àutẹ die la de Pau. Més lous câs ne sàbin pas léyẹ, pénsi. Permou, susmetuts coum soun, qu’anerén aus petits endréts publics, coum hèn tout lou moùndẹ… ou quàsi touts, permou que, si lous àrbẹs e poudèn parla, que-p countarén quin hèn serbìci aus câs, e quauquecop tabé aus òmis qui s’an à esloucha la bouhigue. Û d’aquéts malurous que-s ère dechat gaha en aquéres per û pouliciè de bile sus la Haute Plante.

– Qu’éy ço qui hèt aquiu ?

– E dounc ? tè, que pìchi you !

– Ne sabét pas qu’éy defendut ?

– You qu’at sèy, ya, més pas la mie bouhigue.

L’òmi d’oùrdi qu’at dechè coum aco, permou qu’ét tabé e-s abè à boeyta, més en û endrét reglementàri. Lou téms de y arriba – més qu’ère prou loégn – qu’esté lou soû pantelou qui recebou l’arrous ! Be bedét que n’éy pas toustém coumòdẹ de ha respecta la léy e que counéchi plâ de municipalitats qui se-n bédin toustém hère dap lous câs sus aquét sudyèc.

Toutu quàuqu’arré que-m tesique. À Pau, que parlen de câs « et autres animaux », de quins animaus e parlen ? Arrés n’at sap, lhèu dous moutoûs ? Be dìsin soubén que cau « decha picha lou merinos » ! Per aco, soùnquẹ au téms de la sòude1, ne-n y a pas goàyrẹ per las carrères. E, s’éy lou cas, ne countét pas sus lous aulhès enta amassa ço qui lous moutoûs e dèchen coum soubeni dou lou passàdyẹ. Toutû, que deberén ha coum éy oubligat entaus câs. Qu’at sabét si-n abét û. Que cau amassa beroy la cause en ûe pouchote hèyte esprès e yeta-le en û endrét mercat entad aco. Qu’éy la léy, e si nou la seguit pas, que calera paga ûe aménde. Nou-p demanden pas d’ana boucha lou cu dou bôste câ.

Més, lous « autes animaus », e serén au ménch las baques ? À part las qui soun pintrades sus lou drapèu biarnés, ne-n bedét pas hères per las carrères. E, se-n y abè, que caleré au baquè ûe bère saque enta y ha càbẹ lous pastèts esglachats.

Que-n debét abé hartère de léyẹ causes sus aquét sudyèc, més hicat-pe à la place dous màyrẹs qui sìnnen oùrdis, qui miassen, e qui bédin tout die aquéres garnitures, e qui enténin lou moùndẹ esmalits, permou qu’éy toustém lou câ dous autes lou coupàblẹ.

Û pouliciè, qui gaytabe tout die, que credou de-n abé troubat û. Que souè à la porte d’ûe hémne qui-s troubè susprése d’esta encusade.

– « Qu’éy lou bòste câ, que l’èy bis ! »

– « Més, quin pensat que pouderé esta ét, ce digou en amucha lou soû petit cagnoutot « caniche » ? E credét que dous soûs petits budèts que pot sourti û estrounc d’aquét talh ? »

Que y a û patou qui se-n déu arrìdẹ encoère, d’aquére hèyte…



1 sòude n.f. ouverture du pâturage aux animaux, transhumance (cf. bedat).

Cambiaméns

Amic Yantot,

Perdoùne-m de-t abé dechat chéns noubèles despuch bèth téms a. Que bos, à la retrèyte, qu’èy méy de coéntes que nou-n abi abans. N’éy pas mau, per aco, de tribalhouteya, istoère de goarda lou drin de hourtalesse qui-m demoure. Eslasat sus ûe cadière loungue à l’endoste dou tilhulè, qu’escouti e qu’espìi lou téms : Lou sou n’éy pas trop hissén, més lou bén d’auta, per esta màgrẹ, que seque la tèrre bareytade de frésc. A l’entour de you, ne béy pas que nubles proubassudes ; en guignan de plâ, héns aquéres brumes, que y a û tractur qui-s y passéye debath…pràubẹ paysâ qui-s y harte de proube ! Dou téms dous boéus, que calè aténdẹ e decha picha la griaulhe. Qu’at èy dit au besî : « Ayes paciénce, aquéste bentoulet ne-s mourira pas de sét. Atén dounc û eschalagas, ta ha càdẹ la proube. » E qu’éy ço qui éy aparit. Behide lhèu que durera trop !!!

Tout que cambie. S’as quauqu’arré de destimbourlat per case, pas mouyén de trouba û mestierau. Toustém que proumétẹn, yaméy n’arriben ! Héns la cousine la hémne qu’éy isagne, la prése de la luts qu’a petat, que déu bira lou moulî de cafè à la mâ. E ha biéne qui ?

Déns lou téms, û sìmplẹ plagnet au factur ou au boulanyè, lou lendoumâ, û d’aquéths òmis qui sabè ha de tout chéns abé yaméy après, que-s troubabe aqui ta ha ço qui calè. De méy, qu’ère malî ! Qu’arribabe soubén p’ou tour de mieydie, la daune à qui abè hèyt lou serbici, que-s debè au ménch de l’embita à bébẹ û cop. Aco qu’ère la soutade. Se la daune ère drin làryẹ, que hicabe ûe oye ou chéys oéus héns la biace. L’òmi qu’ère countén, tan de gagnat ! E de méy que sabè oun ana ha bresperoû….

E crédẹs, Yantot, se oéy e gausaben aufri lou medich pagamén, que-s en y debiseré p’ou parsâ ! Que bau miélhe pas y pensa ! E toutû, labets, touts qu’arribaben à bìbẹ coum poudèn. E tout lou moùndẹ que-y troubabe lou soû coùntẹ. Que créy qu’èrem méy bìstẹ serbits àutẹs cops. Tout lou moùndẹ qu’abè besougn de tribalha…

Qu’a cambiat ! E ba dura ?

Amic Yantot, hè beroy, sies toustém hardit.

Lauréns

Lous adius de Corisande

Diane d’Andounch, Duchésse de Gramoun, biscoumtésse de Loubignè, qu’ère badude à Hayetmau en 1554. Maridade à Philippe de Gramoun, Coumté de Guiche en 1567, qu’ère aperade « La bère Corisande », permou d’esta bère hémne e tabé de las méy coutibades dou sou téms. Que seré debiengude en 1573 la mestrésse dou Réy de Nabarre, badut éth, en 1553. Que dìsin qu’abou grane influénce sus lou réy, e que l’aprengou las bounes manières. De reliyoû catolique, que debou tabé abia-u de cap à la coumpousicioû, e que lhebè mème troupes enta l’ayuda. La recounechénce d’Enric qu’ère tan grane, qu’après la batsarre de Coutras, gagnade per Enric en 1587, éth medich qu’ou biengou pourta lous bint e dus drapèus gahats à l’enemic. Diane e Enric que-s serén desseparats en 1591. Més que pòdin dìsẹ qu’éy ére qui prepara lou réy de Nabarre à tiénẹ lou sou réng de Réy de France. Que-s mouri en 1620. La sène dous adius bién segu qu’éy imayinade de toute pèce, més que-s situe sus ço qui pòdin deduìsẹ d’aquéth loung amourous ligàmi.

La sène que-s passe au sou-couc, héns lou parc dou castèth de Corisande oun Enric l’a biengude trouba :

…Lou die que-s en ba… Dou sourélh nou demouren
Que quàuquẹs arrays s’ous terrès…
Qu’éy l’ore oun las tourterèles s’apouren,
Héns las arrames dous laurès…

Que-m sémble qu’as en tu drin de melancounie…
Pourtan anoéyt, quin pouderés abé degrèu,
Quoan tout aci éy pats e armounie ?

Que pénsi, s’ès aciu, que bas parti ballèu…

Qu’at as toustém sabut que la bire auruguère
Nou-m dechèrẹ brigue lou choès,
Enta-m ha réy, e réy de guèrre,
Que-m a tirat d’enter lous pastous e lous boès…

Ne-m pàrlẹs pas de las pastoures…

Corisande !
Nou-m bas pas arcasta peguésses de yoentut !
Si adès cops, drin de houlie s’en demande,
À tu soule qu’at saps, que-m en souy remetut !
Qu’éy héns las toûes mâs qui pouch pausa la cargue
E Diu sap lou hèch s’éy pesan !
D’esta réy, toustém countestat, toustém en targue,
E de nou poudé esta dap tu, soùnqu’en passan…

Més e créds dounc qu’enta la coumtésse de Guiche,
Que sìẹ aysit d’assoubaca lou huganaut,
Quoan lou Pàpẹ, lou réy, la glèyse, tout m’enguiche,
À-u tretta pìrẹ qu’û manaut.

Tu qui-m counéch, que saps plâ qu’éy boune credénci :
E qu’éy la fé, d’aquéths qui soun bràbẹs e francs !
La forme ? qu’éy soubén aha de circounsténci,
Lous òmis ne soun pas tout négrẹs ni tout blancs !
Que-m créy de reliyoû pregoune,
Mème si-m esbarréchi p’ous estréms !
Que crèy que la bite qu’éy boune,
E bìbẹ plâ, qu’éy de ha lou bé tout lou téms…
Si n’èri pas d’aquére traque,
Que sèy que ne m’aberés pas aymat…
Qu’éy aquéth qui tiéns à l’estaque…
Més puch que-m béds deban tu desarmat,
Perqué dounc as aus oélhs coum û crum de tristésse ?

Permou qu’éy û prehoc, qui nou-m pot pas menti…
Que-t èy arrecaptat dap la mie tendrésse,
Adare, qu’éy de you qui-t ba calé parti…

Més que dits ? Ne coumpréni pas Corisande !
Ne souy yaméy partit chéns espèr de tourna !

Enric lou mé beroy ! Lou téms que nse coumande,
E que sèy dap degrèu tout ço qui-m ba pana !

Qu’éy ço qui-t paneré d’oun n’aberi pas rèyte,
Si-t pèrdi, qu’en seré de you ?
Quoan te béy, qu’éy toustém au co mediche estrèyte
Permou qu’éy tu qui-m da la force e la gauyou…

Que ns’en bam touts lous dus decap la quaranténe
Qu’abèm bint ans, quoan m’abrassès p’ou purmè cop,
Brigue nou-m pesè la cadéne,
Qu’auri tout supourtat, chéns trouba qu’ère trop !
Més lou téms nou prén pas la mediche palhère,
Enta nse mesura,
L’òmi de quarante ans qu’éy à l’estiu encoère,
Mile tesics qu’ou hèn dura !
La hémne à quarante ans qu’a deya la premude,
De l’abor qui seguéch l’estiu,
E l’òmi, se l’arrecoutéch per abitude,
Be-n éy tentat de miralha-s en gn’àutẹ briu !

→ Corisande, s’estéy tentat per la coutilhe,
Si quàuquẹ ninarole û moumén m’arresta,
Espie drin quin esté crude la courrilhe,
Ta nou pas trop de pecats m’arcasta !
Enta que lous Francés accèpten Enric Quoàtẹ
Trop soubén loégn de tu, que m’an cercat catras,
Més quoan gagnèy la bole à force de coumbàtẹ,
Que-t èy hèyt û palhat dous drapèus de Coutras !
Ta tu soule que hèy yuncade,
D’aquéths bint e dus oriflous,
Darrigats aus Francés héns la crude yournade
Oun perin tan de couradyous !

Enric, qu’éy aquéth sé qui souy estade rèyne,
N’èri pas méy Diane d’Andounch ou de Gramoun,
Qu’abi au co l’alaude e la coudi-coudèyne,
Lou pinsâ, l’ausèth blu sus lou cèu de la houn !
N’abi brigue besougn de parèlhe auherénte,
Ta t’ayma coum t’aymèy,
E qu’at saps, au malur tabé qu’èri counsénte !
Que-t poudi da de méy,
Més s’aberi pourtat leuyère la couroune,
Que sèy n’éy pas hèyte enta you.

Més you que t’èy besougn per esta bère e boune
Permou qu’èy rèyte de l’auyou
Qui bién tabé de qu’ès la counselhère sàyẹ !

Qu’éy à la France Enric, qui bas débẹ pensa !
Adare aquéth tesic que-t déu esta lou màyẹ
E lous àutẹs plasés qu’ous te cau acassa !

Més que-m hès mau ! e chéns que-m at merìti brigue !

You tabé que-m hèy mau en te parla coum hèy !

Arrenouncia-ns touts dus ? Més e y pénses amigue ?

You, ta-t delibera lou co qu’ou claberèy !

E dìsẹ que la serade aci qu’ère tan douce !

Tan douce de segu que-n plourerèy doumâ !
Més au casau tabé, la flou de l’amarousse,
Qu’a l’aram agradiu més qu’a lou goust ama !
Enric, que-m trouberés doumâ lhèu lède e biélhe,
Qu’aymeri que de you que-t poudousses bremba
Coum abans que l’abor nou destàquẹ la hoélhe,
D’û darré sé d’estiu oun poudoùssem reba…
Més û réy, que déu soùnquẹ bìbẹ enta la taque,
D’assoubaca lou pùplẹ en bèth lou garanti !
Que-s déu claba lou co ta bìbẹ chéns estaque,
E si déu espousa n’éy pas ta-s deberti…
Qu’éy tau bé de l’Estat û prìncẹ qui-s maride,
Qu’éy per debé ! E n’éy pas tout cop dap gauyou !
E si t’éy du, û matrimòni chéns ahide,
Que preguerèy ta tu !... Tu, pénse drin à you…

Si n’a pas lous toûs oélhs, que-m balera la France ?

Taus òmis à serbi, que bau méy que nou n’èm !

Més si nou-t béy pas méy qu’éy trop paga d’abance !

Més qu’èm baduts Enric, ta ha ço qui debém !

Més chéns amou, que bau lou téms qui bire e bare ?

Nou-m sepàri de tu qu’enta t’ayma drin méy !

Qu’auré miélhẹ balut esta-m Réy de Nabarre
Ta-m poudé demoura près de tu à yaméy…

Entau réy dous Francés, ûe estéle immourtèle
Que-s lhebera, qu’at sèy, s’ou noùstẹ crèbe-co !

Més you nou béy boula méy nade tourterèle

Que calè que l’amou qu’anèssẹ dinqu’aco !
Qu’ère arré de-t balha dap la mie fourtune,
Ço qui-t hasè besougn ta-t ana batalha,
Qu’ère chic de ploura, puch qu’éy la léy coumune,
Chéns nou sabé quin sort t’anabe acatralha !
Més o lou mé beroy, loégn de la mie tèrre,
Si-t màndi de parti, d’oun tan me cap-birès,
Qu’éy permou de t’ayma de loégn, drin méy encoère !

Més d’are-enla, be-n seran négrẹs lous laurès !


(À Moumas, lou 22 de Mars 2009)

Moulî adroumit

Au Menicou de las Iroles,

Chens noubèles de las toues, qu’èri tout empensat. Nou-t abi pas bis noumentat sus lou yournal à la hoélhe dous « Convois funèbres » més que debès esta hère mau passan enta demoura tan de semmanes bourroulhat à case, lou telefone descatabat e lou pugnet endoulourit à nou pas poùdẹ escrìbẹ. Au cor dou hoéc, que-t at debès bira adayse e que-t bagabe d’arremoulia las noubèles de la politique. Que sabes toutû que nou y counéchi arré, pas méy qu’û saumét enta hoélha lou tarrissoû dou mesturèt. E, puch que-t carabes, que pensàbi à gnàutẹ Menicou, lou mouliè, defun bèth téms a, qui liurabe dab soun asoulot lous sacs de harie, de rése e de brén. Dab dus hourrups de cafè ou û beyroulot de bî, qu’ère hardit enta-s carga û ou dus quoartaus de milhoc ou de roumén. Que soegnabe las pratiques permou lhèu que serén partides en û dous quoàtẹ àutẹs mouliès dou bilàdyẹ qui emproutaben l’aygue dou Gabas. Qu’abèn séngles pachères e banius enta ha bira l’arroudet e las moules. Maynats, qu’aberém boulut entra enta coumpréne ço qui-s passabe dab aquére chourrère d’aygue e la bire-bare de la barite… Adare, lous moulîs que soun estangats, e lou René de Lapèyre à Siros que clamabe :

Adare qu’éy cadut, qu’éy tout desapitat !
Qu’éy boussat lou baniu, cadude la pachère,
Las sègues qu’an badut, qu’éy coum ûe plechère,
Ta la becade qu’éy û miralh encantat.

L’amic Yausèp de Nabalhes tabé qu’abè escribut de beroyes pouesies sus lou moulî :

Droum ! droum ! lou moulî…

Û drin au desbroum, au cla de la lue,
Ras de l’aygue blue, lou moulî que droum !
Dou soum dou cèu blu, l’estéle l’espie,
Au ras de la bie e soul à l’escu.

Més bam, amic, tu que-ns e pouderés counta û sarrot de hèytes de mouliès, las de l’Escouteplouyes en téms de sequère, e tan d’àutẹs ! Au téms oun s’y hourneyabe en cade maysoû, que sabèn que lou lou tribalh qu’ère aunourat. E à truques de pugnera, que-s at biraben bèth, e qu’abèn lou parat de counta gnafles e youga tours…

Lhèu lou noùstẹ amic Lauréns que-ns en pouderé parla. Que-s parech que y a û moulî brigue adroumit per lou soû parsâ, e lhèu qu’a escoutat lou soû claquet !

Yantot dous Aubiscous

Mayram maumiat

Amic Yantot,

Coum à you, que-t déu ha bisca l’ana d’aquéth moùndẹ de oéy qui criden toustém enta deféndẹ las bèsties. Que plagnen las poures, toutû au soubac, plâ ristoades e abeurades, permou que n’an pas prou d’espassetrèyt héns las cuyoles. Permou de l’estacadé de hèr qui-us pelabe lou cot, qu’an hèyt escourna lou bestia enta que pousquen atégnẹ la minyadére à trubès ûe cléde de hèr, e puya ou bacha lou cap adayse. Que-t an hèyt passa méy de léys e de reglaméns que lou Parlamén de Nabarre, nou pas enta la libertat dous òmis, més enta l’aysinè dou mayram, Lous pràubẹs paysâs nou hèn prou de rebiengut enta hica las bordes coum las caleré suban las léys de France e d’Europe. Baduts e eslhebats au miéy dou mayram, que-ns abèn après aus soegna e à nou pas lous rudeya. Enta l’atelàdyẹ, ne calè pas serbi-s de l’agulhade, més de la paraule, lou bestia qu’at coumprenèn. Segu que-y abè estacadés, yûs, trabes e licols, més que-ns abisabem d’ous hica en douceyan. E ta que nou hassiam pas soufri las bèsties, que-ns e countaben hèytes de las machantes qui nou calè pas segui.

Lou Farou de Barouquet qu’ère û beroy câ gris, brasous, més qu’abè l’oélh bach à ha pietat. Lou péu arrougnous, cargat de brocs e de busquets, n’estuyabe pas las coustétes sarrades d’ûe bèstie qui passabe hàmi. U sé de dalhère, lous òmis en soupan que-u n’embiaben ad’escus de bèts croustoûs, autalèu glapats per lou Farou.

- Bam, Miquèu, que l’as hère màgre aquéth câ, que caleré que tournèssem soubén ta soupa aci.

- Qu’éy de machante hèyte, sabét, qu’ou hàrti, e autâ plâ qu’ou te dau û bouchèth de brén !

Be pénsi que l’at primeyabe, lou bouchèth que debè serbi enta tout l’an !

Que cau dìsẹ qu’en aquéth téms lou moùndẹ que misereyaben, e la rèyte que-s abè dounc à partadya. La pouralhe qu’ère enta bénẹ, que-s amassabe ço qui poudè, soùnquẹ drin de sibade enta-us esloucha la oeberole. Hore lou porc de l’anade, nou minyaben que car de bèstie accidentade abans de la-n embia tau petassè. Lou Miquèu, yustemén, qui bienè emprounta û cabèstrẹ au besî, qu’esté embitat enta disna. Lou frico qu’ère aboundous : bèth talhuc d’esquiau, plâ coéyt e prou beroy adoubat. Més abans de-s en tourna, quoan ana cerca lou cabèstrẹ, que bedou …ûe mule penude !… E que-n y mancabe tros ! Quin hàsti ! Aquére sauce d’ûe mule escoechade, ne la poudou pas debèrzẹ. Que-n escoupibe lountéms, dus ans adarroun, se disèn, à tau pun que lou pot de debat que-u ne penè !

Per noùstẹ, que disèn que calè meylèu pati hàmi que ha soufri las bèsties, e sustout nou pas ha-les estadi ou truca-les dinque que-s en mourìssẹn.

Amic Yantot, porte-t plâ … E, ta disna, àyes àutẹ cause qu’esquiau de mule.

Ugène dou Palouquet

Termières

Amic Yantot,

Quoan coumençabe lou rét de l’ibèr, que-t abi dit qu’ère béroy téms enta pela. Més la frescure de las noéyts que-s éy perloungueyade e à noùstẹ las tripes que-s soun esclarides à las barres dou soulè e lou yamboû que-s trobe arreblat dinque l’os. Aquères bendisques tardibes qu’an neurit l’isagnè dou moùndẹ. La bite care, lous aygats, la malìci dous paysâs permou de la lèyt e de la car, las peleyes poulitiques que-ns espernicaben deya prou…

Ta-m counsoula, lou besî Peyroutoû que-m dit qu’àutẹs cops que y abè autan de grignes p’ous bilàdyẹs, quoan nou seré que permou de las termières e dous passàdyẹs. Be-n y abè peléyes, ad’escus ou s’ous escalès dou tribunal, qui passaben despuch l’arrè gran-pay dinque l’arrè-hilh, permou d’ûe hite – desplaçade se disèn – ou d’ûe carretère barralhade. Més à you, se-m gahe lou berdigòu aquéstẹ tour, qu’éy permou que soun las termières dous bilàdyẹs qui soun, pas cambiades, més esbalisades. Qu’abèn hèyt deya SIVOM (que créy que bòu dìsẹ sendicats) e adare que-t hèn « coumunoutats de coumunes », pèys, coum lou « Pèys dou Miéy de Biarn ». Aco que hè qu’enloc nou-ns e poudém trouba mèstẹs coum à case. Que-s paréch qu’atau que poudém touca subvencioûs, més entertan que hèn praba las countribucioûs. Despuch la Reboulucioû, que-ns e credèm au soubac de las termières dous departamens, més que las t’abèn hèytes segouti, que y a û bintenat d’anades, enta ha las « regioûs ». Sabes pas qu’adare que bòlin ha coum per la houlie dous « remembraméns dous cams » en las anades cinquante : arrasa plèchs e barats, cura arrélhes pregounes enta poùdẹ tira glébes de cinc céns pas ! Lous paysâs que debèn esta méy rìchẹs ! Espie-us tè ! Rìchẹs de déutẹs e de tesics ! Lhèu que sera atau s’arriben à esbalisa las termières dous departaméns e de las regioûs.

Bèn, tu, au ménch, tien-te ploumat, e sies urous per case.

Menicou de las Iroles

Esprit dous biarnés

En tout téms lous Biarnés que bouloun esta mèstẹs à case e qu’esté û malur tad’éths quoan lou noùstẹ Enric s’abisa de counqueri Paris. Acera hore, que se-n abou à supourta de tout pèys ta que-u dechèssẹn la pats. Lous pràubẹs Biarnés, si estoun û moumén rìchẹs de glòri permou dou lou Prìncẹ, nou tardèn pas à recounèguẹ que la glòri n’at balhe pas tout. Lou Biarn endependén e lìbrẹ, û cop Louis XIII apitat s’ou trònẹ, n’estou pas méy qu’û petit parsâ de France, e trattat medich coum lou darrè dous darrès. Més aco, lous Biarnés n’at poudèn pas debèrzẹ. Lou soubiénẹ dou lou téms qu’ous turmentabe. Per bèt cop, que-s pensèn que si poudèn ha tourna l’Enricou ta Pau qu’ous adouciré lou chegrî. Que demandèn, poulidemén, b’at pensat, à Louis XIV d’ous manda l’estatue dou soû gran-pay ta la ha quilha sus ûe place de Pau.

Louis XIV que-s trufabe beroy dou soû gran-pay ! Éth soul qu’abè lou drét d’esta ounourat atau. E que dé l’oùrdi au soû minìstrẹ de manda taus Biarnés û Louis XIV de mesure. Qu’aberét hèyt à la place dous noùstẹs anciéns ? Prénẹ toustém, en aténdẹ miélhẹ. Qu’éy aco qui hén. Més pràubẹ réy de France, nou sabè pas dap qui s’abè lous ahas ! Ah ! Quio ! Que-s credè méy que lou soû gran-pay ! Bas bédẹ, tè ! E qu’ou hiquèn aquéste pigrafe au pè de l’estatue :

Aci qu’éy l’arrehilh dou Noùstẹ gran Enric,
Lou cèu, qui l’abè dat per lou bé de la tèrre
L’a hèyt lou pay dous boûs, deus mechans l’enemic,
Û Saloumoun en pats, û bray Cesar en guèrre.
Plàsiẹ à Diu que yaméy lou màrmẹ e lou metau
Hàssiẹn bìbẹ sa gloère autâ plâ coum à Pau.

Atau que l’at y hén passa. Lou Réy-sourélh n’ère pas que lou petit hilh dou gran Enric.

Quoan arriba la reboulucioû, l’estatue de Louis XIV qu’esté desapitade. Oéy, lous Biarnés qu’an la qui boulèn.

ESPLICS :


Acera hore : là-bas très loin
Que-en abou à supourta : il eut à supporter
Per bèt cop : un beau jour
L’Enricou : leur cher Henri
Louis XIV de mesure : de bonne taille
En aténdẹ miélhẹ : en attendant mieux
Nou sabè pas dap qui s’abè lous ahas : il ne savait pas à qui il avait à faire
U bray Cesar : un vrai César
Atau que l’at y hén passa : ainsi on lui fit passer

Per dèts escuts !

D’auts cops, las gouyates pràubẹs qu’anaben de porte en porte demanda de qué ha lou troussèu. Ûe d’aquères, qui n’abè pas boutat nade houn à hoèc e qui s’aperabe Cendrine, qu’arribè au castèth, e, poulidemén, coum l’at abèn plâ recoumendat, que dit à la dame qu’auré besouy de quàuquẹ so enta-s poudé marida.

- As dounc troubat ?
- O plâ, Madame, ne-m manque pas soùnquẹ lou sos.
- E douc, puch qu’as troubat, que-t dau aqui dèts escuts. Mès que bouy que-m biéngues mucha lou toû pretendut.
- Aco que harèy, Madame.

La bèlhe despousa, la Cendrine que ba ha bédẹ à la dame dou castèth lou pretendut qui ère petit, lè, guèrle e pot-birat.

- Coum t’as anat prénẹ û gouyat atau ? S’ou dit la daune.
- Eh, Madame, s’ou respoun la Cendrine, que bouléts dounc que pousquin trouba per dèts escuts ?

Cesàri Daugé

(Parla d’Ayre sus l’Adou)

Guèrle : qui louche

Hèytes dou Felip

Amic Yantot,

L’an passat, quoan te countèy ûe de las benalèyes dou defun Felip, que-t en arrigous hère. Nou-m estoune pas, permou que sèy qu’au bòstẹ parsâ de bite màgrẹ, que patit méy adàysẹ permou que-p sabét trouba las aucasioûs d’arrìdẹ. Lou Lespy qu’at sabè permou que bantabe coum cau lous Tarrissès d’Aulhoun, lous Pete-mils de Sedzère e lous Cure-mésplẹs d’Espechede. Tabé que-t bau dìsẹ gnàutẹ istoère countade per lou defun Louis, ne la-m èy pas cousude au cor dou hoéc. Que toque ûe arré-maygrane de Gabastoû, de la familhe M. (que cau respecta lous arré-hilhs).

La Liséte que partibe tau marcat de Mourlâs. Countente, permou qu’à las bascoyes de l’àsou que y abè méy de très doudzénes de oèus, de que ha-s quàuquẹ souricot. D’ûe camiasse que sort lou Felip e, pitou patou que-n ban. Au cap d’û téms lou gouyat que dit :

- « Hèy, madame, e-m decharét ha û chebit à l’àsou ?
- - O, e dus tabé, si sàbes ha-t coumprénẹ. »

Tau dit, tau hèyt. Lou Felip que-s aprèsse e, au clot de l’aurelhâ que-n embie û pugnat de mousques-cagnisgues, sàbẹs, d’aquéres rousses qui nou boulen pas, més arpateyen sus lou coé dou bestia. Quins cops de cu ! Coum t’at penses, hémne, bascoyes e oéus en mouléte !

Nou-s cau pas estouna que la Liséte e bouloùssẹ cruba lous sos dous oéus e que calou passa daban lou yùdyẹ.

- « Bam, gouyat, qu’abét hèyt dou tort a d’aquèstẹ bràbẹ hémne. Qu’abét hèyt û desaguis à la soue mounture.
- Nàni, Moussu, que l’abi demandat la permissioû d’ou parla.
- O, e que l’abét dit ?
- Que l’èy dit que lou soû pay e lou soû gran-pay que-s èren mourts … e qu’anabe ereta de grans mouyéns. Labets, de countentè, l’àsou que-s boutè à cu-lhebeta e a-s bouquilha ! Qu’éy ét qui hé destourna la Liséte e qui éy l’encause de la mouléte. »

Nou sèy pas ço qui-n debira, més Yantot, que-t abisaras à las mousques

Ugène dou Palouquet



Esplics :


Benalèyes : mésaventures
Bite màgrẹ : vie difficile
Que patit méy adayse : vous supportez plus facilement
Tarrissès d’Aulhoun : vendeurs de poteries d’Ouillon
Pete-mils de Sedzère : les peureux de Sedzère
Cure-mésples d’Espéchède : mangeurs de nèfles d’Espéchède
Ne la-m èy pas cousude : je ne l’ai pas inventée
Camiasse : mauvais chemin
Pitou patou qu’en ban : cahin- caha il s’avance
Ha û chebit : dire un secret
Mousques-cagnisques : variété de mouche
Arpateyen (arpateya) : courir à quatre pattes
Cruba : percevoir (ici récupérer)
Desaguis : mauvais tour, désagrément
Grans mouyéns : grande fortune
Cu-lhebeta e a-s bouquiha : ruer et se vautrer
Destourna : renverser