Georges, le conteur Gascon

Vidéo du journal televise : Le journal de 13h - TF1


http://videos.tf1.fr/jt-13h/georges-le-conteur-gascon-5854874.html

Lous adius de Corisande

Diane d’Andounch, Duchésse de Gramoun, biscoumtésse de Loubignè, qu’ère badude à Hayetmau en 1554. Maridade à Philippe de Gramoun, Coumté de Guiche en 1567, qu’ère aperade « La bère Corisande », permou d’esta bère hémne e tabé de las méy coutibades dou sou téms. Que seré debiengude en 1573 la mestrésse dou Réy de Nabarre, badut éth, en 1553. Que dìsin qu’abou grane influénce sus lou réy, e que l’aprengou las bounes manières. De reliyoû catolique, que debou tabé abia-u de cap à la coumpousicioû, e que lhebè mème troupes enta l’ayuda. La recounechénce d’Enric qu’ère tan grane, qu’après la batsarre de Coutras, gagnade per Enric en 1587, éth medich qu’ou biengou pourta lous bint e dus drapèus gahats à l’enemic. Diane e Enric que-s serén desseparats en 1591. Més que pòdin dìsẹ qu’éy ére qui prepara lou réy de Nabarre à tiénẹ lou sou réng de Réy de France. Que-s mouri en 1620. La sène dous adius bién segu qu’éy imayinade de toute pèce, més que-s situe sus ço qui pòdin deduìsẹ d’aquéth loung amourous ligàmi.

La sène que-s passe au sou-couc, héns lou parc dou castèth de Corisande oun Enric l’a biengude trouba :

…Lou die que-s en ba… Dou sourélh nou demouren
Que quàuquẹs arrays s’ous terrès…
Qu’éy l’ore oun las tourterèles s’apouren,
Héns las arrames dous laurès…

Que-m sémble qu’as en tu drin de melancounie…
Pourtan anoéyt, quin pouderés abé degrèu,
Quoan tout aci éy pats e armounie ?

Que pénsi, s’ès aciu, que bas parti ballèu…

Qu’at as toustém sabut que la bire auruguère
Nou-m dechèrẹ brigue lou choès,
Enta-m ha réy, e réy de guèrre,
Que-m a tirat d’enter lous pastous e lous boès…

Ne-m pàrlẹs pas de las pastoures…

Corisande !
Nou-m bas pas arcasta peguésses de yoentut !
Si adès cops, drin de houlie s’en demande,
À tu soule qu’at saps, que-m en souy remetut !
Qu’éy héns las toûes mâs qui pouch pausa la cargue
E Diu sap lou hèch s’éy pesan !
D’esta réy, toustém countestat, toustém en targue,
E de nou poudé esta dap tu, soùnqu’en passan…

Més e créds dounc qu’enta la coumtésse de Guiche,
Que sìẹ aysit d’assoubaca lou huganaut,
Quoan lou Pàpẹ, lou réy, la glèyse, tout m’enguiche,
À-u tretta pìrẹ qu’û manaut.

Tu qui-m counéch, que saps plâ qu’éy boune credénci :
E qu’éy la fé, d’aquéths qui soun bràbẹs e francs !
La forme ? qu’éy soubén aha de circounsténci,
Lous òmis ne soun pas tout négrẹs ni tout blancs !
Que-m créy de reliyoû pregoune,
Mème si-m esbarréchi p’ous estréms !
Que crèy que la bite qu’éy boune,
E bìbẹ plâ, qu’éy de ha lou bé tout lou téms…
Si n’èri pas d’aquére traque,
Que sèy que ne m’aberés pas aymat…
Qu’éy aquéth qui tiéns à l’estaque…
Més puch que-m béds deban tu desarmat,
Perqué dounc as aus oélhs coum û crum de tristésse ?

Permou qu’éy û prehoc, qui nou-m pot pas menti…
Que-t èy arrecaptat dap la mie tendrésse,
Adare, qu’éy de you qui-t ba calé parti…

Més que dits ? Ne coumpréni pas Corisande !
Ne souy yaméy partit chéns espèr de tourna !

Enric lou mé beroy ! Lou téms que nse coumande,
E que sèy dap degrèu tout ço qui-m ba pana !

Qu’éy ço qui-t paneré d’oun n’aberi pas rèyte,
Si-t pèrdi, qu’en seré de you ?
Quoan te béy, qu’éy toustém au co mediche estrèyte
Permou qu’éy tu qui-m da la force e la gauyou…

Que ns’en bam touts lous dus decap la quaranténe
Qu’abèm bint ans, quoan m’abrassès p’ou purmè cop,
Brigue nou-m pesè la cadéne,
Qu’auri tout supourtat, chéns trouba qu’ère trop !
Més lou téms nou prén pas la mediche palhère,
Enta nse mesura,
L’òmi de quarante ans qu’éy à l’estiu encoère,
Mile tesics qu’ou hèn dura !
La hémne à quarante ans qu’a deya la premude,
De l’abor qui seguéch l’estiu,
E l’òmi, se l’arrecoutéch per abitude,
Be-n éy tentat de miralha-s en gn’àutẹ briu !

→ Corisande, s’estéy tentat per la coutilhe,
Si quàuquẹ ninarole û moumén m’arresta,
Espie drin quin esté crude la courrilhe,
Ta nou pas trop de pecats m’arcasta !
Enta que lous Francés accèpten Enric Quoàtẹ
Trop soubén loégn de tu, que m’an cercat catras,
Més quoan gagnèy la bole à force de coumbàtẹ,
Que-t èy hèyt û palhat dous drapèus de Coutras !
Ta tu soule que hèy yuncade,
D’aquéths bint e dus oriflous,
Darrigats aus Francés héns la crude yournade
Oun perin tan de couradyous !

Enric, qu’éy aquéth sé qui souy estade rèyne,
N’èri pas méy Diane d’Andounch ou de Gramoun,
Qu’abi au co l’alaude e la coudi-coudèyne,
Lou pinsâ, l’ausèth blu sus lou cèu de la houn !
N’abi brigue besougn de parèlhe auherénte,
Ta t’ayma coum t’aymèy,
E qu’at saps, au malur tabé qu’èri counsénte !
Que-t poudi da de méy,
Més s’aberi pourtat leuyère la couroune,
Que sèy n’éy pas hèyte enta you.

Més you que t’èy besougn per esta bère e boune
Permou qu’èy rèyte de l’auyou
Qui bién tabé de qu’ès la counselhère sàyẹ !

Qu’éy à la France Enric, qui bas débẹ pensa !
Adare aquéth tesic que-t déu esta lou màyẹ
E lous àutẹs plasés qu’ous te cau acassa !

Més que-m hès mau ! e chéns que-m at merìti brigue !

You tabé que-m hèy mau en te parla coum hèy !

Arrenouncia-ns touts dus ? Més e y pénses amigue ?

You, ta-t delibera lou co qu’ou claberèy !

E dìsẹ que la serade aci qu’ère tan douce !

Tan douce de segu que-n plourerèy doumâ !
Més au casau tabé, la flou de l’amarousse,
Qu’a l’aram agradiu més qu’a lou goust ama !
Enric, que-m trouberés doumâ lhèu lède e biélhe,
Qu’aymeri que de you que-t poudousses bremba
Coum abans que l’abor nou destàquẹ la hoélhe,
D’û darré sé d’estiu oun poudoùssem reba…
Més û réy, que déu soùnquẹ bìbẹ enta la taque,
D’assoubaca lou pùplẹ en bèth lou garanti !
Que-s déu claba lou co ta bìbẹ chéns estaque,
E si déu espousa n’éy pas ta-s deberti…
Qu’éy tau bé de l’Estat û prìncẹ qui-s maride,
Qu’éy per debé ! E n’éy pas tout cop dap gauyou !
E si t’éy du, û matrimòni chéns ahide,
Que preguerèy ta tu !... Tu, pénse drin à you…

Si n’a pas lous toûs oélhs, que-m balera la France ?

Taus òmis à serbi, que bau méy que nou n’èm !

Més si nou-t béy pas méy qu’éy trop paga d’abance !

Més qu’èm baduts Enric, ta ha ço qui debém !

Més chéns amou, que bau lou téms qui bire e bare ?

Nou-m sepàri de tu qu’enta t’ayma drin méy !

Qu’auré miélhẹ balut esta-m Réy de Nabarre
Ta-m poudé demoura près de tu à yaméy…

Entau réy dous Francés, ûe estéle immourtèle
Que-s lhebera, qu’at sèy, s’ou noùstẹ crèbe-co !

Més you nou béy boula méy nade tourterèle

Que calè que l’amou qu’anèssẹ dinqu’aco !
Qu’ère arré de-t balha dap la mie fourtune,
Ço qui-t hasè besougn ta-t ana batalha,
Qu’ère chic de ploura, puch qu’éy la léy coumune,
Chéns nou sabé quin sort t’anabe acatralha !
Més o lou mé beroy, loégn de la mie tèrre,
Si-t màndi de parti, d’oun tan me cap-birès,
Qu’éy permou de t’ayma de loégn, drin méy encoère !

Més d’are-enla, be-n seran négrẹs lous laurès !


(À Moumas, lou 22 de Mars 2009)

Lou camî de pèyre (Cançoû dou group "Estar")

Sus lou camî de pèyre dus maynats amasse se-n ban
De cap au cemitèri, û flouquét de roses pourtan
Au darrè déths payboû e mayboune
D’û pas lént seguiben changan
Quoan Marterou e s’anounce au moùndẹ
Qui pourtam las flous û cop l’an

Sus lou camî de pèyre lous maynats b’abèn cambiat tan
L’û dap ûe barbe douce, l’àudẹ las poupétes daban
E qu’anan darrè deu cemitèri
Ta-s tira de l’espia deus grans
Ta-s poùdẹ ayma la boune escounutère
Marterou que n’éy qu’û cop l’an.

Sus lou camî de pèyre p’ou darrè cop qui passaram
Touts en coude l’y sègue lou curè de négrẹ pregan
Qui troubaram payboû e mayboune
E touts lous qui an biscut abans
E atau que-n ba l’ana deu moùndẹ
Adiu Marterou ta gn’àud’an.

Estar

Le chemin de pierre

Sur le chemin de pierre deux enfants s’en vont
Vers le cimetière portant un bouquet de roses
Grand-père et grand-mère suivent clopin-clopant
Quand vient la Toussaint on porte des fleurs une fois l’an

Sur le chemin de pierre les enfants avaient grandi
L’un a des poils au menton, l’autre deux petits seins
Et derrière le cimetière loin du regard des grands
C’est une bonne cachette car la Toussaint c’est une seule fois par an.

Sur le chemin de pierre une dernière fois nous passerons
Les uns après les autres le curé en noir priant
Nous retrouverons grand-père et grand-mère et ceux qui ont vécu avant
Et ainsi va le monde adieu la Toussaint à l’an prochain

Cliquer pour écouter

La maysoû de Terèse (cançoû)

Û tout petit bitàdjẹ
Û beroy casala
Û téyt hèyt en arrèdjes
Û sòu tout labassat
Quoan èri tout maynàdjẹ
Qu’aymàbi à m’escapa
Héns la maysoû de Terèse
Qui hasè tan de boû ana.     → Bis



Qu’ère soubén dap Terèse
L’ore de brespeya
Nou se-n dabe pas hère
S’espiabe tau laca
Ta jou qu’ère û mistère
Toustém renoubelat
L’ahum de la padère
Qui-m hasè babilha.   → Bis


Ta bî qu’abèm poumade
Tabé de cops binat
lous capoûs que cauhaben
Daban lou carbulha
En soulè que secaben
Esquilhots, aberâs
La maysoû qu’embaumaben
Las poumes de cabau. → Bis


Dap lou téms tout qu’arribe
Ço qui déu arriba
L’eslame s’éy mouride
Lou larè arredat
La porte qu’éy clabade
Lou pourtau barroulhat
Terèse se-n éy anade
Arré nou bau l’oustau.   → Bis


Cliquer pour écouter la chanson

Lou Yamboû (extrait de "Las espernicades)

Extrait du livre « Las Espernicades » d’Alexis ARETTE


Editions Institut Béarnais et Gascon
Princi Negue Editour

(expédition sur commande : 14 euros + 4,50 port et emballage)



LOU YAMBOÛ

Lou Yan de Pichegrulh que-n ère à las darrères :
Pourtan que l’abèn dat remèris de chibau !
Lous remèris, estén lhèu pìrẹs que lou mau ?
En tout cas qu’ère en trî de peta las armères !

Lou medecî, nou sabè méy oun se gaha
Nou hasèn méy arré picures ni poumade !
À la hémne de Yan, hémne bèt drin ploumade
Que digou « Catinou, nou pouch arré méy ha !


Qu’at bedét autâ plâ que you : Yan que s’acabe !
S’a encoère apetit enta quaùquẹ armugalh1,
Balhat-lou d’are enla, tout ço qui-u heré gay !
Nou l’alounqueré pas d’û die si-s pribabe ! »

Lou medecî partit, bién segu Catinou
Que dits à Yan : « E saps, qu’as hère boune mine !
Lou medecî qu’a dit qu’à-t bédẹ, que-s debine,
Que tournes ha û nout2 ! Nou dìguẹs pas que nou !

En sus qu’a dit : lou regìmẹ ? Dechém-lou càdẹ !
Que bas poùdẹ tourna minya de ço de boû !
Dits-me dounc ço qui pouderi ha qui t’agràdẹ ! »
-« E dounc tè : ûe bère tranche de yamboû ! »

« Yamboû, yamboû... Nou boulerés pas àutẹ cause ?
Que me-n demoure chic e n’éy pas lou moumén...
Lou yamboû, que cau plâ que-n coumprénguẹs l’encause
Qu’ou me cau ta la mouléte d’enterramén3... »

********

Mème si nou l’èy biste escribude s'ou lìbẹ,
La morale d’aco que la pe bau balha :
Lous mourts en dap4 lous mourts qu’an à s’at espalha,
Més cau pas entertan que-ns empéchẹn de bìbẹ !

________________________

1 « Armugalh » : rumination ; pris au sens de manger.
2 « Tourna ha û nout » : mot à mot, refaire un noeud = revivre.
3 « Mouléte d’enterramén » : l’omelette au jambon était de tradition dans la collation offerte après les enterrements.
4 « En dap (en dab) » = dap (dab) : avec.

Moulî adroumit

Au Menicou de las Iroles,

Chens noubèles de las toues, qu’èri tout empensat. Nou-t abi pas bis noumentat sus lou yournal à la hoélhe dous « Convois funèbres » més que debès esta hère mau passan enta demoura tan de semmanes bourroulhat à case, lou telefone descatabat e lou pugnet endoulourit à nou pas poùdẹ escrìbẹ. Au cor dou hoéc, que-t at debès bira adayse e que-t bagabe d’arremoulia las noubèles de la politique. Que sabes toutû que nou y counéchi arré, pas méy qu’û saumét enta hoélha lou tarrissoû dou mesturèt. E, puch que-t carabes, que pensàbi à gnàutẹ Menicou, lou mouliè, defun bèth téms a, qui liurabe dab soun asoulot lous sacs de harie, de rése e de brén. Dab dus hourrups de cafè ou û beyroulot de bî, qu’ère hardit enta-s carga û ou dus quoartaus de milhoc ou de roumén. Que soegnabe las pratiques permou lhèu que serén partides en û dous quoàtẹ àutẹs mouliès dou bilàdyẹ qui emproutaben l’aygue dou Gabas. Qu’abèn séngles pachères e banius enta ha bira l’arroudet e las moules. Maynats, qu’aberém boulut entra enta coumpréne ço qui-s passabe dab aquére chourrère d’aygue e la bire-bare de la barite… Adare, lous moulîs que soun estangats, e lou René de Lapèyre à Siros que clamabe :

Adare qu’éy cadut, qu’éy tout desapitat !
Qu’éy boussat lou baniu, cadude la pachère,
Las sègues qu’an badut, qu’éy coum ûe plechère,
Ta la becade qu’éy û miralh encantat.

L’amic Yausèp de Nabalhes tabé qu’abè escribut de beroyes pouesies sus lou moulî :

Droum ! droum ! lou moulî…

Û drin au desbroum, au cla de la lue,
Ras de l’aygue blue, lou moulî que droum !
Dou soum dou cèu blu, l’estéle l’espie,
Au ras de la bie e soul à l’escu.

Més bam, amic, tu que-ns e pouderés counta û sarrot de hèytes de mouliès, las de l’Escouteplouyes en téms de sequère, e tan d’àutẹs ! Au téms oun s’y hourneyabe en cade maysoû, que sabèn que lou lou tribalh qu’ère aunourat. E à truques de pugnera, que-s at biraben bèth, e qu’abèn lou parat de counta gnafles e youga tours…

Lhèu lou noùstẹ amic Lauréns que-ns en pouderé parla. Que-s parech que y a û moulî brigue adroumit per lou soû parsâ, e lhèu qu’a escoutat lou soû claquet !

Yantot dous Aubiscous

La glèyse de noùstẹ

Adroumide à l’assès dou campana tout drét
Qui-ns ensegne lou cèu coum ûe mâ lhebade,
Ûe luts à l’aùtẹ qui jamés n’éy matade,
La glèyse à l’Angèlus dou matî desbelhade
Apère ta prega Diu tout cadû qui cret.

Dessus dou gran auta, héns ûe brume d’or,
L’Eternau, dab lou dit, bié de crea la tèrre ;
E, tutan dinqu’au cèu la coumplente darrère,
L’Anjou dou Judjamén, de la predicadere,
Hè desbelha lous mourts adroumits per tout cor.

Lou soulè, tout pintrat, hè bédẹ l’unibèrs :
En û cor lou sourélh, à l’aùtẹ û tros de lue.
La coulou d’aquéth cèu qu’éy toustém autan blue
E dou soum entau houns, de tout coustat qu’enlue
Coum si dou paradis pourtaus èren ubèrts.

Las séntes e lous sénts deboucious soun aquiu,
Daurats ou destindats, héns las raubes sarrades.
Quoan lou moùndẹ éy passat e las portes barrades,
Liurats à d’éths medichs, souls dab las lous pensades,
S’entertiénen tout dous, la noéyt dab lou Boun Diu.

Be tiés hère de place au houns dou noùstẹ esprit,
Tu, gleysote de case, ô glèyse tan aymade !
La tasque biélhe ou joéne estou dehéns batiade !
E tout cop qui la mourt l’a-t ad’ére aperade,
Cadû que j’ey passat, per toustém benedit.

Doctou Brau-Tapie

« Lanes e larès » 1933